Forum sur la musique kabyle - toute la musique kabyle est sur www.musiquekabyle.com -

Tameddit n Bbwass

Akka i d ddunit teḥṣiḍ
Mi tɣabeḍ tefniḍ
A k-ṛebbin medden tissas
Wamag asm’akken telliḍ
Mi tṛeεdeḍ ur tekniḍ
Qqaren-as itett di lheṛma-s
Fell-i asm’ara d-yeɣli yiḍ
A mm timmi at-twaliḍ
F yeεdawen-iw ad yali wass

Qqnent wallen-iw si lemṛaṛ
Ugint a k-xeẓrent maḍi
Melm’ara i sent-tgiḍ leqrar
Akken a k-n-rrent tamuɣli
Tneğṛeḍ targa i uxeṣṣar
Tseggex lğetta tɣelli
Ah lemmer i nettemcawaṛ
Tili ur nḥeddeṛ i tigi

Am lexyal beddeɣ i ṣṣerṣar
Deg wull ttṛebbiɣ iẓmi
Lemmer di k-terbiḥ meqqar
A s-d-afeɣ ssebba i yexf-i
Teḍra yid-ek am yir sɣar
Yeṛğa lkanun d inebgi
Ma ziɣen ɣur-ek wwiɣ lεar
Xas ad yeḍs wedrum fell-i

Segmi d-nelḥa ur k-ḍlimeɣ
Rriɣ-n ccada i yiri-k
Ddaw yifer-ik zgiɣ zedleɣ
Ssusumeɣ qebleɣ lebɣi-k
Assa dayen ndeklaweɣ
Ma d keč teğğa-k tezmert-ik
Xas tɣaḍeḍ-iyi ad zewğeɣ
Ur ttɣimaɣ s idis-ik

Nwiɣ tceṛḍ-ik tiyita
Assa zdat-ek d asawen
Zip deg-k ur d-igwri wara
Ğğan-k ula d imeṭṭawen
Tessembabbayeḍ deg sufa
Ɛeğben-k tzehhuḍ yis-sen
Xas akken lğetta-k tebbwa
Mazal tesmendageḍ-ten

Txil-em ṛğu u reggwel ara
D kem i t-tafat-iw
Ad i-d-yettban uẓekka
Yebbweḍ-ed ṣṣefr-iw
Ul-iw yeqber iceqqeq
Tekna tgecrirt-iw
W’aa iεudden zzman a ɣ-yefreq
Ah ya taḥnint-iw

Mačči d ayen aa d-ḥebseɣ
A zerrben wussan
Lğetta-w ur s-zmireɣ
Leεyub deg-s ɣman
Ma ğğan-iyi widak ḥemmleɣ
Ur sseḍlameɣ zzman
Lmut mi d-tenna a k-ɣafreɣ
D nek i tt-yebɣan

Ḍḥiɣ-d ur sεiɣ azal
Ger widak ḥemmleɣ
Ɛebbaɣ azalgu n temsal
Ur das-zmireɣ
Ula d zzwağ n leḥlal
Deg wul-is udreɣ
Gliɣ yis-s deg umuṛeğ n ccwal
Armi i tt-smesxeɣ

Yid-em ẓriɣ kulci yekfa
Ur d-igwri usirem
Tabburt n ṭemẓi-w tefla
Aḍu a s-d-ikeččem
A ṣellaḥ n At-Dwala
Ndehɣ-n yis-en
Ilit yid-i ddaw lqaεa
M’ara d-yas wassen

Lmutt B-bwegrawl-iw

Ay aḥbib n tegrawla
Xas terka lğetta
I lebda a d-beddern isem-ik
Xas henni ur nfeccel ara
Ayen ibɣun yeḍra
D nekni i d imawlan-ik
Yeṛğa-yaɣ yakw uẓekka
Assa neɣ azekka
A n-nernu s idisan-ik
Tamara ur tt-nettağğ’ara
Ad aɣ-teεfes tirrugza
Tefka-yaɣ-d lεahed lmut-ik

Tettnaɣeḍ ɣef izerfan
Ay ṛekḍen yiḍan
Ḥemmlen akw medden i ṣṣut-ik
Sliɣ-asen mi s-nnan
Widenni i ɣ-yecqan
Tikelt-a ur das-yeslik
Xas ṭṭeṣ iḍes n ṣṣebyan
An-neεwez i yetran
A d-nettmektay tudert-ik
Ma t-tikli ss iteddu zzman
Ur daɣ-tt-ittbeddil wemdan
Thedden mdel ccefṛ-ik

Deffir-ek d izli i n-yernan
Myeɣleb iẓekwan
Wala ixxamen di tudrin
Lecyax yettṛebbin lexwan
Ṛwan iseflan
A sen-ttqezziben a tt-rkin
Sseɣlin-d rrehba g zenqan
Ur zgilen amkan
Zellun s yisem n ddin
Ẓẓur d lfuci imeεfan
Γeṭṭlen yis-s widak yeɣran
Tezdeg m’ara tt-id-awin

Weltma-k sliɣ-as tuɣwas
Tẓemḍ-itt yemma-s
Mebεid serrḥent teɣratin
Leεlam icudden layas
A gma ur yetteɣras
Nεemmed i tuğğla n tlawin
At rrebrab d at tkerkas
Yetthuddun tissas
Mğamalen ad a tt-rwin
Abhim nni εerqent-as
Yeggumma ad yerẓ ṣṣrima-s
A sen-iqqar hennant tudrin

Taεekkemt n Tegrawla

Lemmer di yetteε lxaṭer
Ddiq deg wul m’ad-yili
A nettweḥḥid netḥeyyeṛ
Imɣi n ṣṣwab a ifetti
Agwni n liser mi ɣ-d-iḍheṛ
Nettḥiri a t-nerr d asuki
Negguma a nwexxeṛ i lewhi
B-bwidak  i ɣ-yesmunedlen
Ula t-tamaziɣt nni
I nenwa ara ɣ-yesduklen
Bḍan-tt arkw d leqsabi
lqerra mačči yiwen

Mi nɣil neffɣ-ed ɣer luḍa
Ad aɣ-d-immager usawen
Leqbayel si zzman akka
Di tegmatt i deg i tt-uɣen
Acḥal n yergazen at ṣṣfa
Nesɣim-asen-d nekkes-iten
Amek ara ɣ-yebru facal
Amek ara nqabel azekka
Ma nekna i uhubbu n temsal
Aεdaw ur ɣ-izeggel ara
Akken a d-nerret i ccetla azal
A-nḥelles a-nbeddel ssira

Mi ɣ-tekkes tuqqsa usemmiḍ
Tayeḍ a tt-id-nesnulfu
Yeggumma a ɣ-yeffeɣ yiṣṣiḍ
Nefhem izedɣ-aɣ waḍu
Deg yeẓri n leğnas nettɣiḍ
Qqaren-as amek ara tefru
Neẓra assen m’ara tefru
A tt-ɣellten wid tt-iceεlen
Ma d wid yebbwin ddeεwessu
Lfeṛḥ-is ur s-ḥeddṛen
A d-tegwri tağğalt tettru
At-tezzağğaw deg meṭṭawen

D tteɣzizat i ɣ-yenɣan
Nettṛebbi afud i tismin
Gar-aneɣ argaz mi d-iban
A d-nexleq deg-s amqennin
D winna i kwen-iğğan εeryan

Tamsalt-iw           

D acu kan i ugadeɣ          
Ma yeḍḥ-d ur das-ṣebbreɣ          
Ugadeɣ a yi-teğğeḍ at-tṛuḥeḍ          
Mačči di bnadem i usmeɣ          
At-tenwuḍ ad as-d-sɣimeɣ          
Ma yella azekka tzewğeḍ          
Ttamεict i m-ssarmeɣ          
Lemmer zmireɣ ad am-tt-fkeɣ          
I yiman-iw a tt-kkseɣ          
Awi-d kan at-tidireḍ          
          
Lemmer ḥṣiɣ lehna a tt-tafeḍ          
Ad waliɣ tennecṛaheḍ          
Ad qebleɣ tebrek n zzman          
Lemmer ḥṣiɣ at-tidireḍ          
Temɣer a kem-id-tessiweḍ          
Ad kkeɣ ṣṣeḥṛa bla aman          
Di ssaεa ney di tayeḍ           
Ẓriɣ amnaṛ a t-tekkeḍ           
Sand’akken ur d-tettuɣaleḍ          
At-ternuḍ ɣer wid yefnan          
          
Ma ad ḥṣuɣ ur kem-ẓerreɣ          
Ugadeɣ a medden ad jehleɣ          
D yir abrid aa di-yefken          
Isem n ṣṣber a t-εefseɣ          
D lmuhal a t-id-bedreɣ          
Xas ad iyi-ɣunzun medden          
S kra bbwi keṛheɣ a t-nɣeɣ          
S rrṣaṣ yiwen ur t-zeggleɣ          
U d isem n Ṛebbi a t-nekṛeɣ          
S yis-s u ttamneɣ dayen          
          
Teffɣ-ed lemεehda qerrḥen          
Alamma cudden-i lekfen          
Ddunit weḥdi ara tt-kemmleɣ          
Xas ul-iw yemmuɣebnen          
Mi-gṛuḥ ad yelhu dayen          
S ccfayat a t-snedfeɣ          
Ma yuddr-ed tin nniḍen          
Ihi fehmet a medden          
Leḥmala-w d ayen ṛxisen          
D lmuḥal dg-es εecqeɣ          
          
Ay asenduq n teslit          
Amek akkagi i k-gan wussan          
Aggus d lfuḍa n zzit          
Lğebba amendil yeḍwan          
A d-ttcetkin i ddunit          
F tkekkuct i ten-yebdan          
          
Amendil awraɣ yeḥzen          
Ineggi di leεwaceṛ          
Di texzant i-gettwaxzen          
Ur d-yeffiɣ acḥal n ccheṛ          
Yemmuɣben yettru          
Yeggumma ad yettu          
Tin akken i s-yerran leqder          
Ddaw wakal yebda-tt rekku          
A yir ddunit a yir ddunit          
          
Yefka lemεahda ur yeḥnit          
Di lḥaṛa mi tt-ssarden          
Alamma tefna ddunit          
Ur t-telsi tin nniḍen          
Iεemmed i wurɣu          
Tiɣersi a t-tekfu          
Ammus a t-yegzem dayen          
Wala taεzizt a tt-yettu          
A yir ddunit a yir ddunit          
          
Lemmer leḥnana umendil          
Ikesb-itt ula d akal          
Ṣṣifa-s tili ur tettbeddil          
Xas iḍal fell-as lḥal          
Lemmer imeṭṭawen          
Ad i-tt-id-rren          
Ad neggiɣ deg yiḍ deg uzal          
A ɣelbeɣ iɣeẓrawen          
A yir ddunit a yir ddunit          
          
Anda-t wexxam-ik a ṣṣber          
Txil-ek εeṛḍ-iyi yibbwass          
Iẓri-w icebbel am lebheṛ          
Rniɣ ṭṭlam timḍellas          
A tanṭelt ihin          
Ttxil-em rnu-yi-n          
Eg-iyi tardast ttama-s          
Laxeṛt a tt-nennaɣ di sin          
A yir (Ɛyiɣ) ddunit a yir ddunit

I Ddunit-iw          

I wum’ara ḥkuɣ i wum’ara ḥkuɣ          
Γef wid yi-iğğan ttruɣ          
          
Rriɣ ul-iw deg ufus-iw          
Hemjen seg-s akw medden          
Adif yegguğ seg yiɣes-iw          
D yir ssem i t-iweṛten          
D leqsabi i tṛuḥ temẓi-w          
Tlatin urεad zemmen          
Tezga tcebbwel targit-iw          
Zgiɣ d lmut i ttarguɣ          
I wum’ara ḥkuɣ i wum’ara ḥkuɣ          
Γef wid yi-iğğan ttruɣ          
          
Mmuhebleɣ di temẓi          
Xeddemɣ akken i di-yehwa          
Assa kullec ifat-iyi          
Teğğa-yi u d ṣṣeḥḥa          
Keṛheɣ ad muqleɣ lemri          
Rẓag ur s-zmireɣ ara          
Udem-iw seg ɣeblan yezwi          
Tcebbel temduct-iw tluɣ          
I wum’ara ḥkuɣ i wum’ara ḥkuɣ          
Γef wid yi-iğğan ttruɣ          
          
Ḥeṛṛemn-iyi leḥbab-iw          
Amur n lehna ur t-sεiɣ          
Uɣeɣ-tent di tgecrar-iw          
Mi mmɣeɣ ad beddeɣ ad ɣliɣ          
Ur rbiḥeɣ imawlan-iw          
Armi i yi-ifuten i d-ukiɣ          
Skuffreɣ-ten di temẓi-w          
Ddeεwessu ard a tt-ṛwuɣ          
I wum’ara ḥkuɣ i wum’ara ḥkuɣ          
Γef wid yi-iğğan ttruɣ          
          
Ttarguɣ-ken ay imawlan          
Bɣant a ken-ẓrent wallen-iw          
Ddaw wakal hatt tethennam          
Testeεfam seg waṭṭan-iw          
Kfut fell-i yir ussan          
Nğeṛt-iyi d abrid-iw          
A n-ternu ṣṣura-w yeεyan          
Ddunit yid-es ad fruɣ          
I wum’ara ḥkuɣ i wum’ara ḥkuɣ          
Γef wid yi-iğğan ttruɣ